Астана. 17 шілде. Baq.kz – АҚШ-та оқып жүрген Қайрат Қасымбеков пен Дина Қасқабаева есімді ерлі-зайыптылар жуырда ұлды болды. Шетелде дүниеге келген нәрестенің есімі – Әмірәлі. Отағасы Қайрат Қасымбеков «Болашақ» бағдарламасымен мемлекеттік басқару мамандығы бойынша Америкада оқып жүрген студент. Әмірәлі болса Қасымбековтер отбасында туылған екінші ұл.
Шетелде жүріп, перзентті болған ерлі-зайыптыларды шетелдегі қазақстандық студенттер бірлестігі - «ҚазАльянс» өкілдері арнайы құттықтап, жас отбасыға ұйым атынан қаржылай көмек көрсетті.
«"ҚазАльянс" шетелде оқып жүрген ерлі-зайыптыларға көмек көрсету Қазақстан Республикасының жас отбасыларды қолдау саясаты аясында жасалып отырған игі шара. Сол арқылы біз шетелдегі Қазақстан студенттерінің бірлестігі қайда жүрсек те, өзара әрқашан жәрдем ете алатынымызды көрсеткіміз келді» дейді "ҚазАльянс" қоғамдық бірлестігінің президенті Рашид Аюпов.
ҚР Білім және ғылым министрлігінің дерегіне сәйкес, 2014 жыл санағы бойынша 45 мың Қазақстан студенті шетелдің оқу орындарын тәмамдаған. «ҚазАльянс» қоғамдық бірлестігі «Қазақстан 2050» Жалпыұлттық қозғалысы аясында құрылған дүниежүзіндегі барша қазақстандық студенттердің басын қосқан ұйым. «ҚазАльянс» шетелдегі қазақ отбасылары мәселесіне ерекше көңіл бөліп, жастар арасында «отбасы саясатын қолдау» бағдарламасын одан ары жүзеге асыра бермек.